مخاطر الأيسكريم النيتروجيني

كتب: أحمد حسين

من فترة انتشر فيديو على الفيس بوك عن محل جديد يقول إن عنده أيس كريم يخليك تدخن ”تدخين صحي!“. 

الموضوع نفسه غريب ويشد، يعني إيه تدخين صحي؟ 

هو في حاجة اسمها كده فعلًا؟ في حاجة اسمها تدخين صحي؟ فلما اتفرجت على الفيديو لقيت إنه الموضوع عن نوع جديد من الآيس كريم، أكله من هنا، أراني أطلع بخار من بُقي من هنا.

النتيروجين السائل والدخان السحري!

لما قريت الكلام اللي مكتوب على الفيديو، لقيتهم بيقولوا إن التدخين الصحي ماينفعش غير مع أيس كريم النيتروجين السائل! نيتروجين سائل؟ اللي درجة حرارته سالب 196 درجة مئوية؟ اللي هو أول ما عرفته ده كانوا بيعملوا عليه تجارب أطفال، بإنهم يحطوا فيه البلالين فتكش وتنكمش من كتر ما هو درجة حرارته منخفضة، بقوا بيعملوا منه أيس كريم دلوقتي؟! طيب بلاش، ده أكله صحي أصلًا؟!

ماهو النتيروجين السائل؟

خلونا الأول نتكلم عن النتيروجين السائل، وهو مادة درجة حرارتها منخفضة جدًا. بنستخدمها في إيه؟ بنستخدمها في تبريد الأجهزة والكمبيوترات، وفي كيوإزالة الجلد غير المرغوب فيه في التطبيقات الطبية، وكمان في فيزياء درجات الحرارة المتدنية، واللي فيها بيدرس العلماء تأثير درجات الحرارة شديدة البرودة على المواد. يعني مفيش فيهم حاجة ليها علاقة بالأكل، أومال موضوع الأكل ده جيه منين؟

الموضوع ده ظهر مع استخدام الشيف البريطاني المشهور ”هيستون بلومينثال“، لما بدأ يعمل أطباق زي ”بيض النيتروجين“ أو ”باكون (لحم خنزير/بقري) النيتروجين“ أو ”أيس كريم النيتروجين“، والأطباق دي بقيت أطباق أساسية بعد فترة قصيرة، ومن بعدها معظم المطاعم بدأت تستخدم نفس التقنية وأصبحت طريقة مشهورة.

هل استخدام النتيروجين السائل في الأكل غير مضر؟

بروفيسور ”بيتر بارهام“، من مدرسة الفيزياء بجامعة بريستول، قال إن النيتروجين السائل ده مش أكتر من غاز نيتروجين غير ضار، تم تبريده لدرجة حرارة منخفضة جدًا لحد ما أصبح سائل. لكن على الرغم من إنه _وهو غاز_ غير ضار، لكن لو ماتمش التعامل معاه بحذر، ممكن يسبب حاجة اسمها “أثر الصقيع“ أو الحرق البارد للجلد، يعني تعرض أنسجة الجسم للإصابة بحروق نتيجة تعرضها لدرجة حرارة منخفضة جدًا.

أما فيما يتعلق بالأكل، فبروفيسور براهام بيقول إنه مفيش مشكلة من النيتروجين السائل طالما لم يتعدى ”النسب المسموح بيها“، فلما بيستخدموه بيحطوا منه كمية صغيرة جدًا (تقريبًا مقدار معلقة صغيرة)، على المكونات بتاعة الأيس كريم وهي في حالتها السائلة، وبيبدأ النيتروجين السائل يتفاعل معاها ويجمّدها، وفي نفس الوقت بيبدأ يتحول لغاز ويتبخّر علشان كده بيعمل البخار ده اللي بيقولوا عليه ”دخان صحي“.

طيب هل ده معناه إنه آمن؟ الإجابة لأ، بروفيسور براهام أضاف إنه زي ما الناس مابتشربش المياه المغلية أو الزيت المغلي، ولا بيحطوه على جسمهم، فلازم الناس تتعامل مع النيتروجين السائل بنفس المعاملة دي لأنك لو شربت مثلًا نيتروجين سائل، اللي هيحصل إنه هينزل يتجمد في معدتك، وهيعمل كُتل كده أشبه بالقطع الزجاجية، ودي ممكن تؤدي لجرح المعدة أو انفجارها، بمعنى إنها ممكن تسبب أذى من الأخر يعني.

اللي لفت نظر الناس ساعتها لموضوع النتروجين السائل بالأساس حادثة حصلت، سنة 2012، لبنت بريطانية اسمها ”جابي سكانلون“ عندها 18 سنة، راحت على المستشفى والأطباء شافوا إنهم لازم يستأصلوا جزء من المعدة بسبب انفجارها بعد ما شربت كوكتيل كان بيحتوي على نسبة عالية شوية من النيتروجين السائل، ومن ساعتها ومعظم الناس مركزين مع النيتروجين السائل وأخطاره على الجسم.

”د. أليكس فالافانس“، باحث من جامعة ليدز، قال إن الإنسان ممكن يبلع كمية كبيرة من النيتروجين السائل، ومايحسش في الأول إن في حاجة غلط، وكل ما كانت الكمية أكبر، كل ما الخطر كان كارثي أكتر لأن الكمية الكبيرة اللي بتتبلع دي (اللي هي نقدر نقول عليها ملئ الفم يعني)، بتنتج حوالي 25 لتر من الغاز، والنسبة دي ممكن تعمل كُتل كبيرة من النيتروجين في المعدة، وده هيؤدي لأخطار صحية ممكن توصل لعملية جراحية.

كمان، حذر الأطباء من تعامل ”غير المختصين“ مع النيتروجين السائل، لأن خطورته عليهم بتبقى أكبر. يعني مثلًا، لو حد مابيعرفش يتعامل مع النيتروجين السائل ووقعت منه نقطتين على إيده مش مشكلة، أما لو حط إيده في النيتروجين السائل (ودي هتبقى غشومية غير مبررة منه)، فإيده غالبًا هتتجمد وهتقع. يعني، تخيل بقى لو بلعه مثلًا، لإنه كونه غير مختص وبيستخدم حاجة زي دي للرفاهية وفي غير مجالها بالأساس، تخلي احتمالات إنه مايبقاش فيه معرفة بالنسب المسموح بيها من الأساس واردة!

عمومًا، الموضوع مش محسوم بشكل قاطع، يعني ماحدش قال إن النيتروجين السائل ضار بشكل أساسي، بل على العكس، في علماء شايفين إنك لو استخدمته بالنسب المظبوطة هيبقى مُبهر، بس لو النسبة في الأيس كريم زادت، أو جيه على جلدك أو في عنيك أو غيره، فغالبًا هيسبب لك مشاكل كتير جدًا.. آه، حاجة كمان، مفيش حاجة اسمها ”تدخين صحي“، كلمة تدخين ماظنش ينفع تجتمع مع كلمة صحي أبدًا والله يا جماعة.

المصادر:

• bbc
• time

_______
مواضيع مشابهة أو ذات علاقة بالموضوع :

تعرف علي مخاطر إستخدام النيتروجين السائل في الأطعمة

أخصائية تغذية: «آيسكريم النيتروجين» مسبب لانفجار المعدة

لماذا النيتروجين السائل خطير؟