نصيحه قبل تغيير الكفرات

يسأل احد الاخوة :  ماهي افضل الإطارات للجيوب الخ  ؟
وتكون الاجابات متعدده والاختلافات كثيره كل شخص يدلي بدلوه حسب مايراه وتجربته ...

ولكن .
ماذا تعرف انت عن انواع الكفرات ؟؟
لاتقول لي برجستون افضل كفر
والثاني يقول افضلهم ميشلان
والثالث جنرال افضل وعمره طويل
والرابع هنكوك له صوت  ...
بدون ان تستند الى دليل مادي واضح
وتزيد حيره السائل  ...
ولو تسألني
ماهو افضل كفرات  ؟؟
لا استطيع ان اجيبك الا بهذه الاجابه المطوله
👇👇👇👇👇👇👇👇👇👇👇

لابد ان تعرف الاقسام الرئيسيه للكفرات وبعدها تقرر بنفسك ماهو المناسب لسيارتك على حسب استخدامك وطبيعة قيادتك ومناطق القياده

..
من المؤكد أن الكفرات لها تقييم عالمي بعد الاستخدام وهو موجود في احد المواقع ،
فاذا رغبت بشراء كفر معين تستطيع تعرف تقييم هذا الكفر مقارنه مع كفرات اخرى من جميع النواحي..
الكفرات لها نقاط قوه ونقاط ضعف تنجح في مكان وتفشل في مكان اخر ، هذا راجع لعدة عوامل . نوعية الطرق . نوعية الاستخدام وكفاءة قائد المركبه وسعر الكفر .
هذه المعلومات يجهلها وكلاء وموردين ومسوقي ومستخدمي الكفرات من واقع بحثي ..
المشكله اغلب العارفين بالكفرات معلوماتهم ناقصه او مغلوطه ..
الكفرات تنقسم الى خمس اقسام رئيسيه وهي موجودة ومكتوبة في الكفرات ... وهي اهم تقسيم للكفرات عالمياً حيث تختلف هذه الاقسام في تركيباتها البنياويه والنقشه  ..
واليكم اهم انواع الكفرات :
1- كفرات الطرق المعبده فقط الثابته في الطريق بدرجه اولى وهي تحمل رمز  (HP ) ومعناها : هاي وي بروفمنز ، اي طرق معبده ورياضيه ذو ثبات عالي وممتازه للأزفلت ، وقدرتها التطعيسيه والبريه صفر ، يعني تدخل فيها للبر( تتلف) يعني قصرت من عمرها النصف + اصوات رجه + انزلاق + عمر قصير .

2- كفرات الطرق المعبده ومريحه وهي تحمل رمز (HL)  هاي وي لوكسري . مريحه جداً وهدوء عالي وممتازه للأزفلت . وترابي فقط وقدرتها التطعيسيه والبريه 10 %  يعني طلعتين للبر اكتب عليها السلام تتلف .. تتلف يعني ممكن تصدر صوت او زلقه لانك عرضتها لشغله ماهي شغلتها ..

3- كفرات لجميع انواع الطرق من زفلت وبر وخلافه ورمزها (HT ) هاي وي تيرن هذه متعددة التضاريس ولكن كفائتها اقل من رقم 1 و 2 نسبياً في الأزفلت وافضل من 1و 2 في البر وجيده جداً للأزفلت وقدرتها التطعيسه والبريه 30 %  اي جيده في البر .

4- كفرات مخصصة للأزفلت والبر واداء عالي في الغراز والجبال وتشبث جيد في الطعوس وتحمل رمز (AT) يعني اول ترين لجميع انواع الطرق ويفضلها طيور البر وقدرتها التطعيسيه والبريه 40 %  جيده جداً في الأزفلت وجيده جداً في البر .

5- كفرات مخصصه للجبال والطين والغراز والرمال والثلوج ، ولا تصلح للأزفلت ورمزها (MT) يعني مود تيرن ، وهذه نقشتها خشنه جداً وصوتها عالي في الأزفلت وقدرتها التطعيسيه والبريه 50 %  ممتازه للبر مقبوله في الأزفلت .
باختصار :
كفر HP كفر رياضي جداً أزفلتي .
كفر HL كفر مريح جداً أزفلتي .
كفر HT كفر لجميع انواع التضاريس .
كفر AT كفر لجميع التضاريس صالح للبر والحجر الحاد .
كفر MT كفر للبر والجبال والحجر الحاد.  ورياضي للبر فقط .
هذه الانواع الرئيسيه 👆👆 التي لابد تحددها بنفسك ..
بعدها تدخل في مواصفات الكفر
وهي ثانويه أمام الاقسام الرئيسيه .
الاقسام الثانويه هي :👇
يوجد التدوير وهو عمر الكفر ومدة خدمته من 400 وفوق ممتاز يخدم 80 الف كيلو ولكن زيادة في الصلابه .
يوجد التركشن اي الثبات وتماسك الكفر بالأزفلت الافضل AA وبعدها A وبعدB وبعده C .
بعدها تمبرشر الافضل A وبعده B وبعده C ..
وبعده تبحث عن رمز السرعه
رمز H سرعته 210 كيلو
رمز U سرعته 200
رمز T سرعته 190
رمز S سرعه 180 وهكذا ..
تاريخ صنع الكفر ..
تقييمي الشخصي حسب مزاجي انا وتجاربي انا فقط .....
كفرات HL مركبها لسوبربان لانه عائلي يلزمهم كفرات مريحه وخطوط طويله ومتماسك  وممتاز وكان خيار موفق .
كفرات HT مركبها للجيب لان طلعاتي للبر كثير في طعوس وخطوط وكان خيار موفق .
وكفرات AT مركبها على اكستيرا للبر وكان خيار موفق لما يتعرض له في البر من ضغط عالي عليه من حجر ومطبات ، وكان خيار موفق ولله الحمد .
احب اشدد بأنه لابد من فهم هذا التقسيم لانه هو التقسيم ذو الدرجه الاولى وبعدها تدخل على المواصفات الفرعيه ،
لاينبغي مقارنة الماركات ببعض الا اذا كان من نفس القسم . بعض الاخوان يقول سيارتي ضعيفه بطعوس وسياره فلان قويه بطعوس وبعد الكشف نجد اختيار نوع الكفر غير مناسب لطبيعه المنطقه  او كفرات تتقطع بسبب اختيار نوع غير مناسب للمناطق الجبليه والحصى مثل مناطق الجبليه بجنوب المملكه او ارض المدينه المنوره.
الشاهد من هذا الموضوع ..
انك تفهم الاقسام الرئيسيه لنوع الكفرات لكي تاخذ النوع المخصص لطبيعه ارضك واستخدامك لكي تعطيك اداء ممتاز.
المصدر